Gísli Eyjólfs
ÍA tapaði í kvöld 3-1 fyrir Keflvíkingum í 6. umferð Bestu deildar karla. Þetta var þriðji tapleikur ÍA í sumar.
Lestu um leikinn: ÍA 1 - 3 Keflavík
Gísli Eyjólfsson var svekktur eftir leik.
„Það er örugglega dálítið mikið sem klikkaði en ég veit það bara ekki almennilega núna, þurfum að fara aðeins yfir þetta og pínu líta í spegil allir leikmenn. Þetta er bara ekki nógu gott."
Skagamenn voru ekki góðir sérstaklega í seinni hálfleik núna í kvöld.
„Ég er bara ekki með svörin fyrir þig því miður fannst við alltaf vera eftir á og lélegir í einvígum. Þetta var bara ekki góður leikur á okkar hálfu í dag."
Það var búist við miklu frá ÍA í sumar en þeir hafa ekki farið vel af stað.
„Ég held að allir þurfa gera betur og step up, það er of mikið búið af þessu móti og við þurfum að fara vakna. Þetta er alls ekki nógu gott og viljum gera betur en þetta."
Skagamenn styrktu sig vel í vetur og var spáð ofarlega í töflunni.
„Erum með fínan hóp og mjög gott lið. Við erum ekki að ná þessari stigasöfnun það er ekki seinna vænna að fara drífa sig að safna þessum stigum áður en það verður of seint."
