Arnór Ingi og Þorlákur Árnason handsala samninginn
Bakvörðurinn Arnór Ingi Kristinsson er genginn í raðir ÍBV frá Leikni en hann fetar þar með í fótspor föður síns. Þetta kemur fram í tilkynningu Eyjamanna í dag.
Arnór Ingi er 23 ára gamall en hann lék með Leikni frá 2020, með stuttri viðkomu í Val.
Hann spilaði 83 leiki og skoraði 2 mörk á tíma sínum hjá Leikni en yfirgaf félagið á dögunum eftir að hafa rift samningi sínum.
ÍBV tilkynnti í dag um komu hans en hann er annar leikmaðurinn sem ÍBV fær frá Leikni í þessari viku á eftir Omar Sowe.
Arnór fetar í fótspor föður síns, Kristins Inga Lárussonar, sem var meðal annars í liði ÍBV sem varð Íslandsmeistari- og bikarmeistari árið 1998.
Hermann Hreiðarsson stýrði ÍBV aftur upp í efstu deild á nýafstaðinni leiktið en hætti með liðið eftir tímabilið. Þorlákur Árnason tók við og mun stýra Eyjamönnum í Bestu deildinni á næsta ári.
Athugasemdir
