Liverpool heimsækir Leeds í ensku úrvalsdeildinni á sunnudag en Jurgen Klopp, stjóri Liverpool, sat fyrir svörum á fréttamannafundi í dag. Eins og oft áður var margt áhugavert sem fram kom í máli Þjóðverjans.
Hann skaut meðal annars á Gareth Southgate, landsliðsþjálfara Englands sem lét Trent Alexander-Arnold byrja á miðjunni gegn Andorra í liðnum landsleikjaglugga.
„Ef þú horfir á leikina okkar sérðu að staða Trent hefur þegar breyst, ekki í öllum leikjum en þegar það er möguleiki. Það er því engin þörf á því að gera hann að miðjumanni," segir Klopp.
„Af hverju ættir þú að gera besta hægri bakvörð í heimi að miðjumanni? Ég skil það ekki."
Þá segir Klopp að ef Trent myndi spila á miðjunni þá væri hann betri sem varnartengiliður en 'átta'.
Á fréttamannafundinum gagnrýndi hann einnig hugmyndir FIFA um að HM verði á tveggja ára fresti en ekki fjögurra ára. Hann segir að leikjaálagið á fótboltamenn sé þegar komið út fyrir öll velsæmismörk.
Sjá einnig:
Klopp veit ekki enn hvort Brassarnir fái að spila
Athugasemdir
