Birkir Bjarnason landsliðsmaður var að vonum mjög sáttur eftir magnaðan 1-0 sigur á Króötum í undankeppni Heimsmeistaramótsins. Birki fannst sigurinn sérlega sætur þar sem margir öflugir leikmenn hafa ekki verið að spila mikið vegna meiðsla að undanförnu.
Lestu um leikinn: Ísland 1 - 0 Króatía
„Það eru mjög margir sem hafa verið í meiðslum og ekki spilað mikið undanfarið þannig að ná að vinna á móti þessu liði er mjög sterkt. Þetta var hrikalega sætt.“
Birkir segist alltaf hafa haft trú á að fá sigurmark í leikinn en hélt sjálfur að boltinn væri á leiðinni yfir þegar Hörður Magnús skoraði.
„Ég held að allir hafi haldið að hann væri að fara yfir. Þetta var nú ekki góður skalli en frábært að hann fór inn og alveg hrikalega mikilvægt.“
Birkir er að koma til baka eftir meiðsli en gat spilað í rúmar 80 mínútur í kvöld.
„Ég er ekkert búinn að spila í þrjá mánuði. Það er svolítið mikið. Ég er búinn að vera að æfa gríðarlega vel. Bæði með landsliðinu og sjálfur og er kominn í mjög gott form. Það sem vantar helst er leikformið. Mér leið mjög vel en var orðinn svolítið þreyttur í lokin,“ sagði Birkir sem býst við erfiðum leik gegn Finnum í september.
„Það er annar erfiður leikur. Þetta er mjög gott lið, við sáum það hér heima. Það verður hrikalega mikilvægur leikur fyrir okkur ef við ætlum að gera eitthvað í þessum riðli.“
Nánar er rætt við Birki í sjónvarpinu hér að ofan.
Athugasemdir
