Jasmín Erla Ingadóttir.
Jasmín Erla Ingadóttir gæti leikið sinn fyrsta A-landsleik í dag þegar Ísland leikur við Portúgal í umspilinu fyrir HM.
Þetta er hreinn úrslitaleikur þar sem sigurliðið kemur til með að vinna sér sæti á HM sem fram fer á næsta ári - eða þá inn í annað umspil sem fram fer í Nýja-Sjálandi í febrúar á næsta ári.
Flautað verður til leiks klukkan 17:00 og þá verða taugarnar þandar hjá stuðningsfólki Íslands, en stelpurnar okkar eru að reyna að komast inn á HM í fyrsta sinn.
Jasmín, sem er 24 ára, gömul átti stórkostlegt sumar með Stjörnunni þar sem hún endaði sem markadrottning Bestu deildarinnar. Hún var kölluð inn í hópinn eftir að Elín Metta Jensen lagði skóna á hilluna.
„Hún hefur komið fínt inn í þetta, staðið sig fínt og sýnt fína hluti hérna," sagði Þorsteinn Halldórsson, landsliðsþjálfari, um Jasmín í viðtali í gær.
Berglind Björg Þorvaldsdóttir, sóknarmaður íslenska liðsins, var einnig spurð út í innkomu Jasmín í hópinn.
„Hún er búin að standa sig gríðarlega vel. Jasmín er frábær leikmaður og persóna. Það er gott að fá hana í hópinn," sagði Berglind.
Það verður fróðlegt að sjá hvort markadrottning Bestu deildarinnar leiki sinn fyrsta A-landsleik í kvöld er stelpurnar okkar berjast um það að komast inn á HM í fyrsta sinn í sögunni.
Sjá einnig:
Skuggaframherjinn sem á skilið tækifæri með íslenska landsliðinu
Athugasemdir
