West Ham er þegar undir pressu þrátt fyrir að deildin sé ekki farin af stað. Stuðningsmenn liðsins eru reiðir yfir því að ekkert hefur verið gert á leikmannamarkaðnum þrátt fyrir að liðið hafi verið að berjast við falldrauginn á síðasta tímabili.

Grady Diangana fór til West Brom og sú sala bjó til pirring meðal West Ham stuðningsmanna. Félagið hefur verið að gera tilboð í James Tarkowski, varnarmann Burnley.

Það er áhugavert verkefni framundan hjá David Moyes gegn Steve Bruce sem sérfræðingar telja að hafi sýnt klókindi á leikmannamarkaðnum. Newcastle hefur fengið Ryan Fraser, Jamal Lewis og Callum Wilson í sínar raðir.

Tomas Soucek er í líklegu byrjunarliði West Ham en hann fór í stutta sjálfskipaða einangrun eftir landsleikjagluggann eftir að hafa umgengist starfsmann tékkneska landsliðsins sem greindist með Covid-veiruna. Soucek fór svo sjálfur í skimun en fékk neikvæða niðurstöðu.

Fabian Schar, Martin Dubravka, Dwight Gayle og Paul Dummett eru á meiðslalista Newcastle og Matt Ritchie er tæpur. Callum Wilson og Jamal Lewis eru báðir í líklegu byrjunarliði en Ryan Fraser þarf víst smá tíma til að komast í almennilegt stand.

- Newcastle hefur unnið níu útileiki gegn West Ham í ensku úrvalsdeildinni.

- Hamrarnir hafa skorað tvö mörk eða fleiri í hverjum af síðustu fimm úrvalsdeildarleikjum gegn Newcastle þrátt fyrir að hafa mistekist að vinna liðið á síðasta tímabili.

Laugardagur:
11:30 Fulham - Arsenal
14:00 Crystal Palace - Southampton
16:30 Liverpool - Leeds
19:00 West Ham - Newcastle