Ástand brasilíska leikmannsins Oscars er sagt stöðugt eftir að hann fékk fyrir hjartað á miðri þrekæfingu. BBC segir frá þessum fregnum í dag.
Oscar, sem var á þrekhjóli á æfingu hjá Sao Paulo, veiktist skyndilega og féll af hjólinu en hann var meðvitundarlaus í tvær mínútur áður en hann var fluttur með sjúkrabíl á spítala.
Brasilíumaðurinn á 48 A-landsleiki og 12 mörk fyrir þjóð sína.
Hann lék eftirminnilega með Chelsea frá 2012 til 2017 þar sem hann vann ensku úrvalsdeildina í tvígang og Evrópudeildina áður en hann gekk í raðir Shanghai Port í Kína þar sem hann lék í sjö ár.
BBC segir að ástand Oscars sé stöðugt og að hann sé á leið í frekari rannsóknir.
Oscar, sem er 33 ára gamall, er sagður vera að íhuga að leggja skóna á hilluna, en hann samdi við Sao Paulo til þriggja ára í desember á síðasta ári.
Athugasemdir
