Óli Stefán var stoltur af sínu liði í dag.
„Gríðarlega svekktur eins og alltaf eftir tapleiki. Hugsanlega hefði ég verið svekktur líka með jafntefli, frammistaða minna manna var mjög góð og ég er mjög stoltur af öllum sem að spiluðu í dag,'' sagði Óli Stefán Flóventsson, þjálfari KA manna eftir 0-1 tap gegn Breiðabliki í 4. umferð Pepsi Max deildar karla, í kvöld.
Lestu um leikinn: KA 0 - 1 Breiðablik
Breiðablik skoraði eina mark leiksins úr vítaspyrnu á 3. mínútu og Óli Stefán hafði þetta að segja um vítaspyrnudóminn í upphafi leiks: „Ég sá þetta ekki, en hann virtist vera viss og við verðum bara að treysta því að þeir séu með þetta á hreinu.''
KA liðið hefur einungis nælt í 3 stig úr fyrstu 4 umferðum deildarinnar, en Óli Stefán er jákvæður og bjartsýnn: „Já, það er gríðarlega svekkjandi en ég verð að horfa á það sem að við erum að gera vel og við erum með nýtt "concept" í gangi hér fyrir norðan. Á meðan að við erum að spila svona og að gera réttu hlutina, þá get ég ekki beðið um meira.''
„Mér fannst einungis tímaspursmál hvenær við myndum troða boltanum inn, gerum gott mark sem að er dæmt af vegna rangstæðu. Ég set spurningamerki við þegar þeir bjarga á línu, með hendi, undir lok leiks,'' sagði Óli Stefán.
Viðtalið má sjá í heild sinni í spilaranum hér að ofan.
Athugasemdir
