Hollenska stórveldið Ajax er búið að krækja sér í sóknarleikmanninn Bertrand Traoré á tveggja ára samningi.
Traoré kemur á frjálsri sölu eftir að hafa verið hjá Villarreal síðustu mánuði, en hann skoraði aðeins eitt mark í 11 leikjum á seinni hluta tímabils fyrir spænska félagið.
Traoré kom til Villarreal á frjálsri sölu síðasta janúar eftir fjögurra ára dvöl hjá Aston Villa, sem gaf honum leyfi til að binda endi á samning sinn við félagið sex mánuðum fyrir áætlun.
Traoré er 28 ára gamall og hóf atvinnumannaferilinn sinn hjá Chelsea. Tímabilið 2016-17 var hann lánaður til Ajax og skoraði 13 mörk í 38 leikjum fyrir félagið og snýr hann aftur í hollenska boltann.
Þessi lykilmaður í landsliði Búrkína Fasó var mikilvægur hlekkur í liði Lyon áður en hann var keyptur til Aston Villa sumarið 2020, fyrir tæplega 20 milljónir punda.
Good to have you back, Bertrand! ????????
— AFC Ajax (@AFCAjax) July 15, 2024
Athugasemdir
