Arnór Ingvi Traustason kom við sögu í gærkvöldi er New England Revolution gerði 2-2 jafntefli í MLS deildinni.
New England heimsótti Atlanta Utd og úr varð hörkuleikur þar sem 40 marktilraunir litu dagsins ljós í heildina.
Heimamenn í Atlanta voru betri og tóku forystuna snemma leiks en Adam Buksa jafnaði fyrir leikhlé og kom gestunum svo yfir þegar leikar hófust á ný.
Atlanta náði jöfnunarmarki og fékk Arnór Ingvi að spila síðustu tíu mínúturnar en lokatölur urðu 2-2.
New England er með 12 stig eftir 11 umferðir.
Atlanta Utd 2 - 2 New England Revolution
CFR Cluj varð þá rúmenskur meistari þegar liðið lagði Universitatea Craiova að velli en Rúnar Már Sigurjónsson var ekki í hóp og hefur ekki verið í hóp í rúman mánuð.
CFR er með fjögurra stiga forystu á FC Steaua Bucharest fyrir lokaumferðina, eftir að Steaua gerði óvænt jafntefli við FC Voluntari í síðustu umferð.
Að lokum tapaði CSKA Moskva sínum þriðja leik í röð þegar liðið heimsótti Krasnodar í úrslitaleik um þýðingarlaust fjórða sæti rússnesku deildarinnar.
Rússnesk félög fá ekki þátttökurétt í Evrópukeppnum og því lítill tilgangur með deildarkeppninni annar en að krýna sigurvegara alls tímabilsins.
Hörður Björgvin Magnússon var ónotaður varamaður hjá CSKA.
CFR Cluj 2 - 1 Univ. Craiova
Krasnodar 1 - 0 CSKA Moskva