Fjölnir er með níu stiga forystu í efsta sæti Lengjudeildarinnar eftir að liðið vann, 5-1, sigur á Grindavík á Extravellinum í Grafarvogi í kvöld.

Það var jafnræði með liðunum í fyrri hálfleiknum en það voru heimamenn sem tóku forystuna.

Dagur Ingi Axelsson fékk boltann í gegn, fann Bjarna Þór Hafstein sem skoraði örugglega.

Grindvíkingar fóru að ógna meira þegar leið á hálfleikinn og kom jöfnunarmarkið rétt áður en flautað var til loka fyrri hálfleiks er Josip Krznaric skaut hnitmiðuðu skoti í bláhornið.

Snemma í síðari hálfleiknum fengu heimamenn vítaspyrnu og Dennis Nieblas, leikmaður Grindavíkur, rekinn af velli. Gestirnir voru allt annað en sáttir og mótmæltu þessari ákvörðun en fengu engin viðbrögð frá Aðalbirni Heiðari Þorsteinssyni, dómara leiksins.

Máni Austmann Hilmarsson sendi Aron Dag Birnuson í vitlaust horn og fagnaði áttunda marki sínu í sumar.

Tuttugu mínútum síðar gerði Máni annað mark sitt. Hann og Guðmundur Karl Guðmundsson spiluðu sína á milli áður en Máni fékk boltann í teignum og náði einhvern veginn að tækla hann í netið.

Hann fullkomnaði þrennu sína undir lok leiks. Sigurvin Reynisson átti laglega sendingu á Mána sem skoraði tíunda deildarmark sitt í sumar. Máni er nú markahæstur, tveimur mörkum á undan Braga Karl Bjarkasyni í ÍR.

Áður en flautað var til leiksloka gerði Axel Freyr Harðarson fimmta og síðasta mark Fjölnismanna er hann skaut boltanum fyrir utan teig, af varnarmanni og í netið.

Góður sigur Fjölnis sem eru nú með 30 stig í efsta sæti deildarinnar, níu stigum á undan Njarðvík sem er í öðru sæti. Grindavík er á meðan í 6. sæti með 17 stig.