Frank Lampard, stjóri Chelsea, viðurkenndi eftir leik liðsins í kvöld gegn Leicester að hann hefur áhyggjur af lægðinni sem Chelsea liðið er í þessa stundina.
Chelsea tapaði sannfærandi fyrir Leicester í kvöld en liðið hefur ekki verið að spila vel á síðustu vikum.
„Leicester er lið sem er í góðu formi. Við erum ekki í góðu formi. Við gátum spilað betur í dag, flóknara er það ekki," sagði Lampard.
„Mjög svekktur með að fá mark á okkur svona snemma. Við vorum í góðum málum í desember mánuði, tveimur stigum frá toppnum. Við verðum að fara sýna meiri vinnusemi og komast úr þessum aðstæðum sem við erum í núna. Leicester var betra liðið í dag."
„Leikmennirnir verða að halda áfram en þeir verða einnig að opna augun og skoða þessa frammistöðu í dag. Þeir verða að sjá orkuna sem var í Leicester liðinu sem við höfðum ekki."
Athugasemdir
