Þróttur tapaði fyrir Leikni Reykjavík 1 -3 á heimavelli í fyrstu umferð Lengjudeildarinnar í kvöld. Gunnar Guðmundsson þjálfari Þróttar var eðlilega ekki sáttur eftir leikinn. „Við spiluðum ekki nógu vel til að verðskulda meira og sanngjarn sigur hjá Leikni''
Lestu um leikinn: Þróttur R. 1 - 3 Leiknir R.
Leiknismenn mættu mjög ákveðnir til leiks og Þróttur var í talsverðum vandræðum með að halda boltanum og skapa sér færi framan af leik. Þeir voru þó vel undirbúnir fyrir leikinn að sögn Gunnars. „Við vorum vel undirbúnir, við fáum náttúrulega mark á okkur úr föstu leikatriði tiltölulega snemma leiks og það setti okkur aðeins úr lagi, mér fannst við alveg vera inn í leiknum í fyrri hálfleik''
Leiknismenn skoruðu annað mark sitt eftir aðeins 5 mínútna leik í seinni hálfleik. Gunnar telur það hafa breytt leiknum töluvert. „Þegar við vorum komnir 2 -0 undir var ljóst að þetta yrði brekka fyrir okkur''
Umdeilt atvik átti sér stað undir lok fyrri hálfleiks þegar Guy Smit markvörður Leiknis virtist brjóta á Hafþóri Péturssyni innan vítateigs. Egill Arnar dómari dæmdi hins vegar brot á Hafþór og voru heimamenn mjög ósáttir með þann dóm og töldu sig hafa átt að fá vítaspyrnu.
„Frá þeim stað þar sem ég stend og horfi á það þá fannst mér það vera víti en ég get ekki dæmt 100% um það, dómarinn hefur væntanlega verið í betri stöðu en Hafþór er á því að því að þetta hafi verið víti''
Það vakti mikla athygli að þegar Þróttur samdi við Dion Acoff á nýjan leik. Hann var þó ekki í leikmannahópnum í leiknum í kvöld. Gunnar segir Dion vera nýkominn til landsins og að hann hafi ekki getað æft með þeim ennþá en mæti á æfingu á morgun.
„Vonandi getur hann tekið einhverjar mínútur í bikarleiknum á móti FH''
Þrótturum hefur verið spáð því að enda í kringum 9-10 sæti. Gunnar segir Þróttara vilja gera betur en það. „Við stefnum hærra en það en deildin er sterk og þetta verða allt saman hörkuleikir. Við eigum svolítið í land ennþá og menn eru að koma nýjir inn núna þannig að það tekur kannski smá tíma fyrir okkur að stilla okkur betur af''
Esaú Rojo Martinez nýr framherji Þróttar skoraði eina mark heimamanna eftir að hafa komið inn á sem varamaður og var Gunnar ánægður með hann í kvöld. Hann lagði þó meiri áherslu á það að hans menn yrðu að leggja meiri áherslu á varnarleikinn fyrir komandi átök í sumar.
„Við þurfum líka að huga að því að stilla okkur betur af í varnarleiknum og vera einbeittari þegar við erum að verjast þannig að við séum ekki að fá of mörg mörk á okkur''
Athugasemdir
