ÍA tók á móti toppliði FHL í eina leik dagsins í Lengjudeild kvenna og unnu gestirnir nokkuð þægilegan sigur.

Bandarísku stelpurnar Samantha Smith og Emma Hawkins sáu um markaskorun gestanna sem komust í þriggja marka forystu í upphafi síðari hálfleiks.

Erna Björt Elíasdóttir minnkaði muninn skömmu síðar en Skagakonum mistókst að koma til baka eftir það og urðu lokatölur 1-3.

FHL er í frábærri stöðu á toppi deildarinnar með 28 stig eftir 11 umferðir, átta stigum fyrir ofan Aftureldingu. Ljóst er að FHL ætlar sér upp í Bestu deildina í haust.

ÍA situr eftir í neðri hlutanum, með 15 stig. Skagastelpur eru þó aðeins fimm stigum á eftir Aftureldingu sem situr í öðru sæti í afar jafnri deild.