Schalke var að vinna sinn þriðja deildarleik í röð og er liðið komið með tíu stig eftir fimm umferðir.

Schalke fékk Mainz í heimsókn og verðskuldaði að leiða 1-0 í hálfleik eftir gott mark frá Suat Serdar. Amine Harit átti frábæra stoðsendingu.

Austurríski landsliðsmaðurinn Karim Onisiwo jafnaði fyrir Mainz með stórglæsilegu marki á 74. mínútu en það dugði ekki til.

Harit gerði nefnilega sigurmark Schalke á 89. mínútu. Hann skoraði þá eftir frábært einstaklingsframtak þar sem hann skoraði með fjóra menn í kringum sig.

Stoðsendingin fæst skráð á Jonjoe Kenny sem hefur farið gríðarlega vel af stað í þýsku deildinni. Kenny er hjá Schalke að láni frá Everton.