Mjólkurbikarinn: Helgi og Logi með þrennur á Selfossi

Selfoss, sem er í toppbaráttu Lengjudeildarinnar, tók á móti Íslands- og bikarmeisturum Víkings R. í 16-liða úrslitum Mjólkurbikarsins í kvöld og steinlá.

Leikurinn reyndist fjörugur og var fyrri hálfleikurinn sérstaklega spennandi þar sem færanýtingin gerði gæfumuninn.

Helgi Guðjónsson setti tvennu úr tveimur færum á meðan Selfyssingar áttu tvær stórhættulegar sóknir sem fóru forgörðum og staðan var 0-2 í leikhlé.

Seinni hálfleikurinn byrjaði illa fyrir heimamenn því Aron Darri Auðunsson fékk að líta beint rautt spjald fyrir að toga sóknarmann niður hálfan meter frá markinu. Helgi fullkomnaði þrennuna sína af vítapunktinum en næst var komið að bakverðinum skemmtilega Loga Tómassyni.

Logi skoraði tvö mörk með stuttu millibili gegn tíu Selfyssingum og fullkomnaði svo þrennuna með flottu skoti á 83. mínútu. Afar sannfærandi sigur Víkings sem sendir skýr skilaboð í titilvörninni.