Axel Freyr Harðarson skrifaði í dag undir tveggja ára samning við Kórdrengi en hann kemur til félagsins frá Íslands- og bikarmeistaraliði Víkings.
Axel, sem er 23 ára gamall, var á láni hjá Kórdrengum á síðasta tímabili en snéri aftur í Víking eftir tímabilið.
Leikmaðurinn kom af bekknum í öllum sex leikjunum sem hann spilaði með Víkingum í Bestu deildinni í sumar og þá kom hann við sögu í tveimur leikjum í Mjólkurbikarnum.
Axel talaði um það fyrir tímabil að hann væri opinn fyrir því að ganga aftur í raðir Kórdrengja í leit að meiri spiltíma og nú er það orðið að veruleika.
Hann gerði í dag tveggja ára samning við Kórdrengi og verður því væntanlega kominn með leikheimild með liðið mætir Gróttu í Lengjudeildinni á föstudag. Kórdrengir sitja í 8. sæti með 10 stig.
Axel er framsækinn miðjumaður sem á 47 leiki og 10 mörk að baki í næst efstu deild. Hann hefur einnig spilað með Fram og Gróttu á ferli sínum.
Athugasemdir