The Athletic ræddi við hana og birti viðtalið á vefsíðu sinni í gær. „Það var stórkostlegt. Markið kom mjög seint í leiknum. Ég hugsaði með mér, 'mun það koma, mun það koma?', svo kom boltinn til mín, ég skoraði og tilfinningin var frábær. Við hoppuðum allar upp í loft."

Þarrna er James að ræða um fyrsta mark sitt í ensku úrvalsdeildinni og fyrsta mark Manchester United í ensku úrvalsdeildinni sem kom gegn Liverpool. United er á sínu fyrsta tímabili í deildinni, en kvennalið félagsins er tiltölulega nýstofnað.

James varð 18 ára daginn eftir leikinn gegn Liverpool.

Bróðir Lauren er Reece James, leikmaður Chelsea. Hún hefur alist upp í mikilli samkeppni við bræður sína. Í akademíu Arsenal, þar sem hún var áður en hún fór til Manchester United árið 2018, spilaði hún gegn strákum. „Hraðinn er meiri," segir hún aðspurð að því að spila á móti strákum og stelpum. „Þú verður að vera fljótari að hugsa, hreyfa þig hraðar. Þú verður að gera það."

Á Englandi mega stelpur ekki æfa með aðalliðum fyrr en þær eru orðnar 16 ára gamlar. Því ákvað Arsenal að láta James æfa með strákum. „Þeir voru sjokkeraðir: 'Stelpa að æfa með okkur?' Það tók tvær eða þrjár æfingar fyrir þá til þess að byrja að virða mig."

Hún nefnir eitt augnablik sérstaklega sem breytti hugsun strákana. „Ég fór illa með bakvörðinn og hann datt í jörðina. Allir krakkarnir í U11 liðinu voru að horfa því æfingin hjá þeim kláraðist. Hann féll í jörðina og það var bara þannig. Ég held það sé enn grínast í honum fyrir þetta. Þetta gaf mér sjálfstraust til að gera það sem ég get við boltann."

James er eins og áður kemur fram aðeins 18 ára og leikur hún sem framherji. Síðastliðin tvö tímabil hefur hún skorað 26 mörk í 45 keppnisleikjum með Manchester United.

„Þegar við vorum að alast upp þá vildi hvorugur bróðir minn leyfa mér að vinna; það gerði mig sterkari líkamlega og andlega. Við æfðum öll með pabba. Hann er mjög góður þjálfari. Ef honum finnst eitthvað ekki nægilega gott, þá lætur hann þig vita af því. Það er gott því þú vilt ekki að einhver segi þér að eitthvað sé gott þegar það er í rauninni ekki þannig."

Faðir hennar, Nigel, reynir að mæta á alla leiki, en á síðasta tímabili lenti hann í klemmu þegar Lauren var að spila með United og Reece með Wigan á sama degi. Sem betur fer var einn og hálfur tími á milli leikja og stutt á milli valla. „Hann náði báðum leikjum. Ég held að hann hafi mætt hjá bróður mínum rétt fyrir hálfleik."

„Núna þegar við erum eldri þá vitum við hvenær við eigum slaka leiki og hvenær við þurfum að gera betur. En þegar honum finnst hann þurfa að stíga inn í og segja okkur til þá gerir hann það."

Það verður svo sannarlega spennandi að fylgjast með Lauren á næstunni og í framtíðinni, en grein The Athletic má lesa hérna.