Byrjunarlið ÍBV og Keflavíkur: Aðeins ein breyting vegna leikbanns

Eyjamenn unnu síðasta heimaleik gegn Val, 3-2, og gerðu fyrir það markalaust jafntefli við Breiðablik. Þeir hafa verið á siglingu undanfarnar vikur og rúlluðu yfir Leikni R. í síðustu umferð.

Hermann Hreiðarsson ætlar ekki að breyta neinu og teflir fram sama liði og rúllaði yfir Leikni.

Gestirnir úr Keflavík hafa tapað síðustu tveimur leikjum í röð, báðum á heimavelli, en þar áður unnu þeir Val sannfærandi á útivelli. Keflvíkingar hafa unnið tvo útileiki í röð og verður ekki auðvelt að taka þriðja sigurinn gegn fallbaráttuliði ÍBV.

Sigurður Ragnar Eyjólfsson er neyddur til að gera eina breytingu á sínu liði sem tapaði heimaleik gegn KA eftir hetjulega baráttu. Það tap reyndist afar svekkjandi þar sem Keflvíkingar komust yfir snemma leiks og töpuðu leiknum í uppbótartíma eftir að hafa leikið manni færri nánast allan tímann.

Sindri Kristinn Ólafsson fékk rautt spjald á tólftu mínútu leiksins gegn KA og er því ekki í hóp í dag. Rúnar Gissurarson tekur stöðu hans á milli stanganna.

Þá er Joey Gibbs kominn aftur í hópinn eftir mánaðarlangt frí.