Ari Freyr Skúlason er búinn að skipta um félag. Hann er farinn frá Oostende í Belgíu og genginn í raðir Norrköping í Svíþjóð.
Ari þekkir vel til í Svíþjóð eftir að hafa áður fyrr spilað með Sundsvall og Häcken þar í landi. Hann hefur síðustu fimm árin spilað í Belgíu, fyrst með Lokeren til 2019 og svo með Oostende.
„Ari er nákvæmlega það sem við þurfum. Hann er með mikla reynslu, hefur lengi verið í íslenska landsliðinu og byrjunarliðsmaður í belgísku úrvalsdeildinni. Reynsla hans og leiðtogahæfni munu hjálpa okkur," segir Rikard Norling, þjálfari Norrköping.
Ari getur spilað bæði sem vinstri bakvörður og sem miðjumaður. Norling sér hann fyrir sér á miðjunni.
Hjá Norrköping eru fjórir Íslendingar fyrir; Finnur Tómas Pálmason, Jóhannes Kristinn Bjarnason, Oliver Stefánsson og Ísak Bergmann Jóhannesson.
Ari er 33 ára gamall og á að baki 79 A-landsleiki fyrir Ísland. Hann byrjar á bekknum gegn Liechtenstein í kvöld.
Athugasemdir