,,Ég er hrikalega spennt. Það að spila á Laugardalsvelli er mikill heiður og manni kitlaði í tærnar síðustu helgi að horfa á KR-ingana vinna," sagði Berglind Bjarnadóttir, leikmaður KR í samtali við Fótbolta.net.
Berglind mun leika sinn fyrsta bikarúrslitaleik á morgun þegar Reykjavíkurrisarnir KR og Valur leiða saman hesta sína.
,,Þetta er bara 50/50 leikur, það er ekkert annað. Staðan í deildinni skiptir engu máli. Við höfum fulla trú á okkur og getum unnið öll lið í deildinni, líka Val," sagði Berglind um leikinn.
Valsliðið er vel spilandi og Berglind segir mikilvægt að KR-liðið stöðvi flæðið í leik Valsara ætli þær sér sigur á morgun.
,,Þær eru rosalega vel spilandi. Það þarf að stoppa þetta flæði sem þær náðu upp í fyrri leiknum á móti okkur. Þær náðu að spila boltanum fram og til baka og þá endar það illa. En það þarf bara að stoppa þetta og sækja á þær. Ég held að það sé markmiðið hjá okkur að reyna að sækja aðeins á þær og láta þær bakka."
Hægt er að horfa á allt viðtalið við Berglindi í sjónvarpinu hér að ofan.
