Quashie var öflugur á laugardaginn þegar ÍR sigraði Tindastól 4-2 á útivelli eftir að hafa verið 2-0 undir í leikhléi.

,,Við byrjuðum ekki vel en síðan gerðum við nokkrar breytingar og það hjálpaði liðinu. Við erum ánægðir með úrslitin og mér fannst þetta vera sanngjarnt í síðari hálfleiknum."

Spilaði í nýrri stöðu:
Quashie hóf leikinn í hjarta varnarinnar en í síðari hálfleiknum fór hann á miðjuna. Quashie skoraði fyrsta mark ÍR og dró vagninn í endurkomu liðsins en hann lék mun betur á miðjunni en í vörninni enda ekki vanur þeirri stöðu.

,,Það eru nokkrir leikmenn meiddir og einn leikmaður var í banni. Ég var beðinn um að spila þarna til að hjálpa liðinu. Þetta byrjaði ekki vel þegar við fengum tvö mörk á okkur í fyrri hálfleik en með góðum karakter og vilja náðum við að snúa þessu við í síðari hálfleikinn."

ÍR tapaði 5-0 gegn Fjölni í þriðju umferðinni en liðið kom sterkt til baka gegn Tindastóli.

,,Ef þú átt lélegan leik þá kemur alltaf annar leikur þar sem þú getur reynt að bæta fyrir mistökin með því að gera rétta hluti og vinna. Þetta snýst allt um að fá viðbrögð hjá leikmönnum og það er það sem við gerðum. Vonandi getur það haldið áfram í næsta leik."

Dómararnir allt öðruvísi á Íslandi:
Quashie fékk að líta gula spjaldið undir lok leiksins gegn Tindastóli eftir baráttu við Atla Arnarson leikmann Tindastóls. Quashie var óhress með spjaldið.

,,Mér fannst þetta ekki vera gult spjald. Ég tók boltann, leikmaðurinn fór í mig og datt á jörðina. Lappirnar hans voru fastar við lappirnar mínar, ég labbaði í burtu og fékk gula spjaldið. Því miður hef ég orðið fyrir mörgum tæklingum þar sem að leikmenn hafa ekki fengið gult spjald en svona er fótboltinn. Stundum færðu eitthvað og stundum ekki. Ég held bara áfram, svona er þetta bara," sagði Quashie sem segir að mikill munur sé á dómgæslunni á Íslandi og í Englandi.

,,Dómararnir eru allt öðruvísi og ég er búinn að komast að því að þú mátt ekki tækla sem er svolítið skrýitð," sagði Quashie hlægjandi.

,,Dómararnir eru með reglur og leiðbeiningar hér sem þeir eiga að fara eftir. Stundum koma tæklingar sem þér finnst ekki verðskulda spjald og síðan eru aðrar sem þér finnst að verðskuldi spjald. Þú þarft bara að taka þessu eins og það er, dómararnir gera að sem þeir gera og þú getur ekki einbeitt þér að því hvað þeir gera eða gera ekki. Þú verður bara að halda leiknum áfram og ekki láta dómarana sjá um að vinna leikina."

Sjá einnig:
Leikmaður 3. umferðar - Ásgeir Aron Ásgeirsson (Fjölnir)
Leikmaður 2. umferðar - Robin Strömberg (Þór)
Leikmaður 1. umferðar - Birkir Pálsson (Höttur)