KA - Fjölnir klukkan 18 á sunnudag
Spenna á Akureyri.
Túfa, þjálfari KA.
Það ríkir mikil eftirvænting á Akureyri þar sem KA mætir Fjölni í Pepsi-deildinni á sunnudag en þetta er fyrsti heimaleikur KA-manna á tímabilinu. Nýliðarnir hafa farið feykilega vel af stað, unnu Breiðablik og gerðu svo jafntefli við FH.
Túfa, Srdjan Tufegdzic þjálfari KA, segir að menn séu að gera allt klárt fyrir heimsóknina úr Grafarvoginum.
„Menn eru að gera sitt besta til að gera völlinn kláran. Hann er að koma ágætlega undan vetri, grasið er í fínu lagi miðað við árstíma. Það er mikil spenna í kringum félagið og margir spenntir. Liðið er með fullt sjálfstaust og er að taka næstu skref frá síðasta sumri," segir Túfa.
„Við höfum spilað mjög vel í fyrstu tveimur leikjunum og sýndum það sem ég talaði um fyrir mót, þetta lið er klárt í að gefa öllum liðum í deildinni hörkuleik. Við erum ánægðir með stigin fjögur og frammistöðuna gegn tveimur mjög góðum liðum. Nú er bara markmiðið að gera það sama gegn Fjölni á sunnudaginn."
„Fjölnir er skemmtilegt lið og Gústi (Ágúst Gylfason) er búinn að gera góða hluti með það í mörg ár. Þeir hafa ekki enn fengið mark á sig en okkar verk er að opna vörnina þeirra í þessum leik."
Hrannar og Archie með á morgun
Steinþór Freyr Þorsteinsson hefur verið að glíma við smávægileg meiðsli en vonast er til þess að hann verði klár gegn Fjölni.
„Sjúkraþjálfararnir eru að gera sitt besta til að gera hann kláran fyrir sunnudag. Þetta er smá í lærinu, er ekkert alvarlegt. Við sjáum til á æfingu á morgun hvort hann verði með eða ekki. Þetta er bara spurning um nokkra sólarhringa," segir Túfa.
Bakvörðurinn Hrannar Björn Steingrímsson og miðjumaðurinn Archie Nkumu hafa ekki verið með í upphafi móts vegna meiðsla en eru klárir í slaginn.
„Þeir hafa verið að æfa á fullu alla daga vikunnar. Þeir verða með okkur gegn Fjölni."
19 ára strákur, Bjarki Þór Viðarsson, hefur verið að leika í hægri bakverðinum hjá KA. Hann lék fimm leiki í Inkasso-deildinni í fyrra en er strax kominn með tvo í Pepsi.
„Hann fékk tækifærið eftir að hinir tveir bakverðirnir meiddust, Hrannar og Baldvin Ólafsson. Hann hefur verið að spila vel og vonandi heldur hann áfram svona. Maður verður að vera alltaf klár, tækifærið kemur og þá þarf að nýta það," segir Túfa.
Leikur KA og Fjölnis á sunnudaginn hefst klukkan 18.
sunnudagur 14. maí
17:00 KR-ÍA (Alvogenvöllurinn)
17:00 ÍBV-Víkingur R. (Hásteinsvöllur)
18:00 Grindavík-Víkingur Ó. (Grindavíkurvöllur)
18:00 KA-Fjölnir (Akureyrarvöllur)
20:00 Breiðablik-Stjarnan (Kópavogsvöllur)
mánudagur 15. maí
20:00 Valur-FH (Valsvöllur)
Athugasemdir
