„Spánverjar eru með frábært lið og þetta verður skemmtilegur leikur. Það er alltaf gaman að keppa á móti bestu liðunum. Vonandi verður þetta góður leikur fyrir okkur," segir Kristófer Ingi Kristinsson, leikmaður U21-liðsins.

Kristófer spjallaði við Fótbolta.net á æfingu í morgun en hann spilar fyrir Willem II í hollensku úrvalsdeildinni. Hann hefur spilað tvo leiki í deildinni og er búinn að skora sitt fyrsta mark.

„Maður vill alltaf fleiri mínútur en það er erfitt þegar það eru góðir menn í liðinu. Þá þarf maður bara að vera þolinmóður. Ég þarf að sýna hvað ég get þegar ég fæ að spila."

„Maður bætir sig mikið í fótbolta þarna. Það er mikið lagt upp úr tækni og að spila boltanum. Það hentar mér mjög vel að vera þarna. Fjölskyldan er með mér úti og það er þægilegt fyrir mig, mamma eldar mat fyrir mig. Ég er mjög heppinn með fjölskylduna og gott að vera þarna."

Hann var svo beðinn um að lýsa sjálfum sér sem leikmanni, fyrir þá lesendur sem ekki þekkja til hans.

„Ég er góður á boltanum, hraður og góður að taka menn á," segir Kristófer en viðtalið má sjá í heild sinni í sjónvarpinu hér að ofan. Þar spáir hann meðal annars í leik Íslands og Sviss í kvöld!