,,Ég tók fimmtán tíma ferðalag til að spila þennan leik og ætlaði ekki að koma hingað til að tapa þessu. En svona er þetta stundum," sagði Ólafur Þór í samtali við Fótbolta.net eftir leikinn.

,,Ég er að þjálfa, er ekki að spila, svo þeir gáfu mér heimild til að koma heim í þrjá daga og nú er ég að fara aftur heim. Það er alltaf gaman að spila á móti KR og alltaf gaman að spila á Laugardalsvelli," bætti Ólafur Þór við.

,,Ég hefði viljað fá einn leik til viðbót hérna í sumar og hefði verið til í að fljúga heim í hann, en þetta er svona. Það verður bara að byggja á þessu."

Atli Eðvaldsson þjálfari Þróttar var líka hæstánægður með frammistöðu Ólafs í leiknum og sagði að hann hefði viljað eiga 25 aðra leikmenn eins og hann.

,,Þessi drengur er náttúrulega algjör perla. Það sem hann gefur í leikinn og gefur í liðið er alveg til fyrirmyndar og það væri allt í lagi að hafa 25 svona leikmenn, með svona karakter í liðinu" sagði Atli um Ólaf Þór eftir leikinn.

Þrátt fyrir stórleik í Laugardalnum í kvöld hafa Þróttarar gefið eftir í 1. deildinni og nú þegar er nokkuð ljóst að þeir munu ekki vinna sér sæti í Landsbankadeildinni á næstu leiktíð. Ólafur Þór hélt áfram.

,,Það datt aðeins vindurinn úr okkur þegar það fór að líða á mótið. Ég veit ekki hvað skal segja, hvort menn hafi verið værukærir eða eitthvað. Við náðum bara ekki að klára mótið út. En ef við hefðum verið til í að berjast svona í öllum leikjunum þá hefði staðan náttúrulega verið öðruvísi."

Ólafur Þór hefur leikið með Þrótti í allt sumar sem lánsmaður frá Íslandsmeisturum FH en þetta er hans fyrsta tímabil eftir að hann sleit krossbönd sumarið 2004 en í fyrra var hann á bekknum hjá FH allt sumarið.