„Fyrri hálfleikurinn var frábær. Ef maður skoðar þetta betur í kvöld verður örugglega tilfinningin sú að við hefðum átt að klára leikinn í fyrri hálfleik. Við gerðum það sem við gerðum ekki nógu vel gegn HK og Vestra og það var að verja vítateiginn. Ég er feykilega ánægður með liðið og frammistöðuna og hjartað.“ sagði Óskar Hrafn Þorvaldsson, þjálfari KR, eftir 4-2 sigur á ÍA í dag.
Lestu um leikinn: KR 4 - 2 ÍA
Benoný Breki skoraði svokallaða fullkomna þrennu. Með hægri, vinstri og skalla. Það er ekki hægt að biðja um neitt mikið meira frá framherjanum?
„Nei ekki nema að hann gat skorað fleiri mörk. Þetta var frábært. Benó er senterinn okkar og það er mikilvægt að hann sé með sjálfstraust. Hann var frábær fyrir framan markið, ég er ánægður með það og líka að Luke Rae hafi skorað því hann var frábær í fyrri hálfleik.“
Bryndís Klara lést á Landspítalanum í vikunni eftir hræðilega árás á Menningarnótt á dögunum. Leikurinn var stopp á 17. mínútu leiksins þar sem hún var aðeins 17 ára gömul en þá risu allir á fætur og klöppuðu í heila mínútu til að minnast hennar.
„Það er feykilega gott að gefa fólki tækifæri til að minnast hennar. Mér fannst þetta bara mjög vel til fundið.“
Luke Rae skoraði fjórða mark KR sem kom alveg í lokin.
„Eitt ljúfasta augnablik á þjálfaraferlinum mínum var að sjá hann skora þetta fjórða mark. Þetta var óvenju mikilvægt mark sem í raun og veru kláraði þetta. Þetta var mjög ljúft ég skal viðurkenna það.“
Axel Óskar spilaði á miðjunni sem vakti athygli í aðdraganda leiksins en hann spilaði þar mjög vel.
„Axel stóð sig vel í þessari stöðu. Mér fannst við þurfa líkamlegan styrk inn á miðjuna gegn Skaganum sem við fengum frá honum. Hann leysti þessa stöðu vel, ég er ánægður með hann. Hann hafði ekki mikinn tíma til að undirbúa sig en hann gerði þetta vel.“
Nánar er rætt við Óskar í spilaranum hér að ofan.