Lyon er talið greiða 20 milljónir evra fyrir félagaskiptin og mun AC Milan fá prósentu af næstu sölu verði miðjumaðurinn seldur aftur.

Paquetá er 23 ára gamall og á ellefu A-landsleiki að baki fyrir Brasilíu. Hann var keyptur til Milan fyrir rétt tæpar 40 milljónir evra í janúar 2019 en fann aldrei taktinn í ítalska boltanum. Í heildina kom hann við sögu í 44 leikjum á einu og hálfu ári hjá Milan. Hann kom oftar en ekki inn af bekknum.

Þá er Keita Balde Diao farinn frá Mónakó yfir til Sampdoria í Serie A. Claudio Ranieri er við stjórnvölinn hjá Samp sem hefur ekki gert mikið á leikmannamarkaðinum í sumar eftir hræðilegt gengi á síðustu leiktíð. Ranieri var fenginn til að bjarga Samp frá falli, sem tókst.

Samp er ekki með marga gæðaleikmenn innanborðs en liðið var að ganga frá kaupum á Antonio Candreva á dögunum. Keita Balde, sem var eitt sinn liðsfélagi Candreva hjá Inter, kemur á lánssamningi með kaupmöguleika.

Keita Balde er 25 ára gamall og hefur spilað 30 landsleiki fyrir Senegal þrátt fyrir samkeppni frá mönnum á borð við Sadio Mane og Ismaila Sarr.

Hann skoraði 8 mörk í 24 leikjum fyrir Mónakó á síðustu leiktíð en hann gerði garðinn frægan hjá Lazio þar sem hann skoraði 16 mörk í 34 leikjum tímabilið 2016-17.