Höttur/Huginn vann 3-1 sigur á Augnabliki um liðna helgi í 3. deildinni. Maður leiksins var Jesus Perez Lopez sem skoraði tvö mörk fyrir heimamenn í H/H. Fyrir frammistöðuna var hann valinn Jako Sport-leikmaður umferðarinnar í 3. deild.

Það er hlaðvarpsþátturinn Ástríðan sem velur leikmann umferðarinnar í 3. deild og hlusta má á nýjasta þáttinn, þar sem greint er frá valinu, hér neðst í fréttinni.

Jesus Perez Lopez, sem fæddur er árið 2000, hefur skorað þrjú mörk í þeim fimm leikjum sem hann hefur spilað með H/H í sumar. Hulk, eins og hann er kallaður, gekk í raðir félagsins núna í ágúst-glugganum og hefur skorað þrjú mörk í fimm leikjum.

„Hulk er leikmaður umferðarinnar. Annar sem kom til greina var Magnús Sverrir í Reyni Sandgerði en ég er orðinn þreyttur á að velja Reynismenn. Luke Rae skoraði tvö og kom einnig til greina en umfang sigursins hjá Hetti/Hugin og Hulkarinn skorar tvö finnst mér verðskulda þetta val," sagði Sverrir Mar Smárason.

„Ég er sammála þessu vali, verðskuldað," sagði Alexander Már Þorláksson sem var gestur þáttarins.