England spilar mikilvægan leik á litlum velli - Wiegman svekkt

Þetta er fyrsti leikurinn þeirra eftir að liðið varð Evrópumeistari á heimavelli í sumar. Austurríska knattspyrnusambandið valdi að spila á velli sem tekur 3000 áhorfendur en Sarina Wiegman þjálfari enska liðsins er ekki ánægð með það.

Liðið er nýbúið að spila úrslitaleik á EM þar sem áhorfendamet var bætt, 90 þúsund manns mættu þá á Wembley.

„Þetta eru vonbrigði en það sýnir að kvennafótboltinn er í þróun, við þurfum að hugsa stærra, við getum spilað á stærri völlum. Austurríska liðið hefur þróast vel, þær hafa gert svo vel. Það er jákvætt að það sé uppselt en ég vona að þau taki aðra ákvörðun í framtíðinni," sagði Wiegman.

Ákvörðinin að spila á svona litlum velli var tekin vegna þess að áhuginn á austurríska liðinu virðist ekki vera meiri, í kringum 2000 manns að meðaltali á leikjum liðsins.