Bjarki ræddi við þá Elvar Geir, Benedkt Bóas og Tómas Þór um handbolta, Liverpool og ýmislegt annað en sagði svo eina sögu frá föstudagskvöldinu síðasta.

„Ég gróf stríðsöxina í gær við Arnór Borg Guðjohnsen, hitti hann í gær - ætla ekki að segja hvar, mín vegna og hans vegna og við grófum þetta. Munið þið ekki þegar hann fór að fagna titlinum hjá Víkingi 2021? Hann sagði að Arnar (Gunnlaugsson) hefði sent sér miða og Fylkir hefði ekki viljað fá hann," sagði Bjarki sem er stuðningsmaður Fylkis.

Bjarki setti inn Twitter færslu á sínum tíma: „Arnór Borg mættur að fagna titlinum með Víkingum í stað þess að vera með liðinu sem er ennþá að borga honum laun í síðasta leiknum þegar þeir falla niður um deild. Þetta finnst mér ekkert eðlilega lélegt!!" skrifaði Bjarki.

„Honum var hent út úr hópspjallinu hjá Fylki," skaut Tómas Þór inn í. Arnór var á þeim tíma að verða samningslaus og var þegar orðið ljóst að hann myndi ganga formlega í raðir Víkings eftir að tímabilinu 2021 lauk.

„Við erum búnir að grafa þetta, skulum ekki fara í saumana á þessu. Við erum bestu vinir í dag," sagði Bjarki léttur.

Málið vakti athygli á sínum tíma og má lesa meira um það hér:
Arnór Borg fagnaði í Víkinni - „Þetta finnst mér ekkert eðlilega lélegt"
Arnar Gunnlaugs bað Arnór Borg um að fagna með þeim