Frenkie De Jong og Pedri, leikmenn Barcelona, verða líklega frá út tímabilið ef marka má það sem Xavi, þjálfari liðsins, sagði í viðtali eftir markalausa jafnteflið gegn Athletic í gær.
Báðir hafa verið fastamenn á miðsvæði Börsunga en De Jong fór meiddur af velli eftir aðeins rúmar tuttugu mínútur.
Af myndum að dæma virðist hann hafa snúið á sér ökklann á meðan Pedri meiddist aftan í læri.
„Meiðsli Pedri og De Jong líta ekki vel út, því miður. Þetta virðist alvarlegt. Við erum mjög leiðir og höldum að þeir verði frá í langan tíma,“ sagði Xavi.
Pedri hefur glímt við erfið meiðsli síðasta árið en spænskir miðlar bendla það við leikjaálagið tímabilið 2020/2021 þar sem hann spilaði 78 leiki á einu ári, þá aðeins 18 ára gamall. Síðan þá hefur hann reglulega glímt við meiðsli.
Blóðtaka fyrir Barcelona sem er einnig án Gavi, Alejandro Balde og Ferran Torres.
Athugasemdir
