Arna Sif Ásgrímsdóttir lék í dag sinn fyrsta leik með Glasgow City í Skotlandi. Tilkynnt var um lánssamning frá Þór/KA í desember en ekkert hefur verið leikið í skosku kvennadeildinni eftir áramót vegna heimsfaraldursins.

Þar til í dag. Arna var í byrjunarliði Glasgow og lék í treyju númer átján. Hún skoraði annað mark Glasgow með skalla eftir hornspyrnu á 71. mínútu. Arna spilaði allar mínútur leiksins.

0-3 urðu lokatölur fyrir gestaliðið sem fer upp að hlið Rangers á toppnum. Rangers er í efsta sæti á markatölu en bæði lið hafa 21 stig eftir átta umferðir.

Glasgow sló út Val í 32-liða úrslitum Meistaradeildarinnar í nóvember. Sú viðureign fór í vítaspyrnukeppni. Næsti leikur liðsins er gegn Forfar um næstu helgi.

Smelltu hér til að sjá mark Örnu