Hvernig er stemningin hjá Álftanesi?
Mjög góð, erum mjög sáttar við gengi í síðustu leikjum og það hefur góð áhrif á stemninguna. Það er reyndar alltaf fjör hjá okkur á nesinu.

Hvernig er liðið byggt upp?
Hér eru stelpur úr öllum áttum og góð aldursblanda. Liðið er blanda af reynslumiklum leikmönnum og svo ungum og mjög efnilegum stelpum, fengum 3 stelpur frá Haukum á láni, einn reynslubolta og tvo kjúlla og svo náðum við í eina gamla úr Breiðablik, einnig eru ungar stelpur að koma aftur eftir smá heimsókn í Stjörnuna. Það var mjög gott að fá þennan liðstyrk þar sem við urðum fyrir því óláni að missa tvær góðar í slæm meiðsli í vor, slæmt fótbrot og krossbandaslit en það er bara gamla góða það kemur maður í manns stað. Erum mjög sáttar við hópinn okkar, gríðalega skemmtilegur hópur með flottum kjarna.

Hvernig var undirbúningstímabilinu háttað hjá ykkur?
Fyrir áramót tókum við Futsal með trompi og það skilaði sér líka í Íslandsmeistaratitli og með því vorum við að æfa 2x í viku í Spörtu. Við byrjuðum svo bara á fullu úti eftir það og æfðum 4 sinnum í viku og svo að sjálfsögðu eru allir duglegir að æfa aukalega.

Hver eru markmið sumarsins hjá ykkur?
Þau eru bara skýr. Við ætlum okkur upp um deild.

Hvað hefur komið þér mest á óvart í upphafi móts?
Þessi deild er miklu jafnari en ég hélt. Það eru nokkur lið sem geta barist um það að komast upp og líka hvað við eigum mörg góð kvennalið. Fullt af efnilegum stelpum sem eiga eftir að ná langt.

Hvað finnst þér um nýja deildarfyrirkomulagið?
Algjör snilld, eftir nokkur ár sjáum við að þetta er að skila sér og ég held að þetta sé bara til þess að kvennaliðum fjölgi á íslandi. Stelpur hætta við að hætta og finna sér frekar lið til að spila með í 2 og 1 deild.

Komdu með eina skemmtilega staðreynd um félagið sem fólk veit ekki um:
Þessi er ekki beint um félagið en sveitafélagið heldur sérstaklega upp á Margæsadaginn. Álftnesingar eru mjög ánægðir með að fuglinn kíki við á nesinu.

Eitthvað að lokum:
Allir á völlinn! Aldrei að vita nema að þið hittið forsetann í brekkunni