María Þórisdóttir var á skotskónum fyrir norska landsliðið í mjög svo þægilegum sigri gegn Hvíta-Rússlandi í undankeppni Evrópumótsins 2021. Leikurinn fór fram í Borisov í Hvíta-Rússlandi.
Hvíta-Rússland komst óvænt yfir á 18. mínútu, en Noregur jafnaði og komst yfir áður en flautað var til hálfleiks. Isabell Herlovsen skoraði tvö og gerði María þriðja markið fyrir leikhlé.
María, sem leikur með Chelsea á Englandi, er dóttir Þóris Hergeirssonar sem þjálfar norska kvennalandsliðið í handbolta. Hún valdi að spila fyrir Noreg enda hefur hún búið alla sína ævi í Noregi.
Noregur bætti við fjórum mörkum til viðbótar í seinni hálfleiknum og lokatölur því 7-1 fyrir Noreg.
Noregur er með fullt hús stiga í sínum riðli eftir tvo leiki.
Athugasemdir