Tyrkneska stórveldið Galatasaray er búið að festa kaup á miðjumanninum Mario Lemina sem var að renna út á samningi hjá Wolves.
Galatasaray er talið greiða um 3 milljónir punda fyrir Lemina, sem er 31 árs gamall.
Lemina hóf tímabilið sem fyrirliði Wolves en missti bandið sitt í vetur eftir hegðun sína í tapleik gegn Ipswich Town. Nú er hann kominn yfir til Galatasaray í annað sinn á ferlinum eftir að hafa leikið þar á láni frá Southampton tímabilið 2019-20.
Lemina er varnarsinnaður miðjumaður sem hefur meðal annars leikið fyrir Juventus og Marseille á ferlinum. Hann var landsliðsmaður U21 og U20 liða Frakklands en fékk aldrei tækifæri með A-landsliðinu og leikur því fyrir landslið Gabon.
Hann gerir eins og hálfs árs samning við Galatasaray, með möguleika á eins árs framlengingu, og verður samherji leikmanna á borð við Mauro Icardi, Victor Osimhen og Álvaro Morata.
Galatasaray trónir á toppi tyrknesku deildarinnar með 6 stiga forystu og mætir AZ Alkmaar í 24-liða úrslitum Evrópudeildarinnar.
Lemina spilaði 17 úrvalsdeildarleiki með Wolves á fyrri hluta tímabilsins. Hann hefur í heildina spilað 77 leiki á tveimur árum í Wolverhampton.
?? Mario Lemina, Galatasaray’da! ?????? pic.twitter.com/u3LgAigngW
— Galatasaray SK (@GalatasaraySK) February 5, 2025
Athugasemdir
