Liverpool hefur hafnað því að gista á fimm stjörnu hóteli í Doha í Katar vegna mannréttindabrota sem starfsmenn hótelsins hafa orðið fyrir.
David Ornstein á The Athletic skrifar um þetta.
Liverpool er á leið til Katar í desember að taka þátt á HM félagsliða eftir að hafa unnið Meistaradeild Evrópu á síðustu leiktíð.
Liverpool var boðið að gista á Marsa Malaz Kempinski, fimm stjörnu lúxushóteli sem staðsett er á lítilli eyju sem talin er sem hluti af Doha. Eyjan var smíðuð af mönnum.
Í fyrra komst Guardian á snoðir um að hótelið réði til sín innflytjendur og borgaði þeim lítið sem ekkert fyrir vinnu sína.
Öryggisverðir sem unnu 12 tíma vaktir í 45 stiga hita fengu greitt fyrir það 8 pund, eða rúmlega 1200 íslenskar krónur; ekki fyrir klukkutímann, fyrir allan daginn.
Liverpool hefur greint FIFA og yfirvöldum í Katar frá því að leikmenn og starfsmenn félagsins muni ekki gista á hótelinu, heldur finna sér nýtt hótel í landinu.
Heimsmeistaramótið í fótbolta fer fram í Katar 2022, en ástandið hjá farandverkafólkinu sem er að byggja leikvanga fyrir mótið er slæmt og hefur verið það frá upphafi.
Liverpool mætir til leiks í Katar þann 18. desember næstkomandi.
Sjá einnig:
Liverpool spilar tvo daga í röð - Tveir leikmannahópar
Athugasemdir