Manchester félögin fá falleinkunn fyrir gluggann

Mirror gaf félögum ensku úrvalsdeildarinnar einkunnir eftir því hvernig þeim gekk í viðskiptum sínum í félagaskiptaglugganum. Gefið var á skalanum frá A+ til F, eins og þekkist í breska skólakerfinu.

Everton fær hæstu einkunn en félagið sótti James Rodriguez og fleiri menn sem hafa smellpassað inn í hugmyndir Carlo Ancelotti. Liverpool fær A en stuðningsmenn liðsins eru í skýjunum með að hafa fengið Thiago Alcantara.

Chelsea fær A- en félagið fór mikinn í glugganum. Í umfjöllun Mirror er þó sagt að enn séu nokkrar stöður sem þurfi að bæta hjá þeim bláu.

Manchester félögin fá D+ og D-. Það var búist við meiru frá Manchester City í glugganum eftir að liðið var langt á eftir Liverpool í baráttunni um Englandsmeistaratitilinn.

Stærsti hluti gluggans hjá Manchester United fór í það að orða Jadon Sancho við félagið en hann er enn hjá Borussia Dortmund.