Dagný Brynjarsdóttir.
Dagný Brynjarsdóttir, landsliðskona, gagnrýnir KSÍ á samfélagsmiðlinum Instagram í kvöld.
Aron Einar Gunnarsson lék í gær sinn 100. landsleik fyrir karlalandslið Íslands. Hann byrjaði er liðið tapaði 0-1 í umdeildum vináttulandsleik gegn Sádí-Arabíu.
Eftir leikinn í dag fékk Aron sérútbúna treyju með númerinu '100' aftan á.
KSÍ birtir mynd af þessu en Dagný hefur svarað og er gagnrýnin á störf sambandsins.
„Við Glódís Perla erum enn að bíða eftir okkar 100 leikja treyju síðan í apríl. Litlu hlutirnir í þessari blessuðu baráttu alla daga," skrifar Dagný en skjáskot af færslu hennar má sjá hér fyrir neðan.
Hún bendir á að Birkir Bjarnason hafi fengið sína treyju í september í fyrra og Aron í dag, en hún og Glódís hafi enga treyju fengið þó ekki hafi vantað verkefni hjá kvennalandsliðinu upp á síðkastið.
Athugasemdir
