Liverpool 2 - 2 Wolves
0-1 Goncalo Guedes ('26)
1-1 Darwin Nunez ('45)
2-1 Mohamed Salah ('52)
2-2 Hwang Hee-Chan ('67)
Liverpool og Wolves gerðu jafntefli í 64-liða úrslitum enska bikarsins í kvöld og þurfa því að endurspila leikinn. Liðin mættust á Anfield en munu eigast næst við á Molineux í Wolverhampton.
Alisson Becker reyndist ólíklegur skúrkur í liði Liverpool í dag þar sem hann gaf bæði mörkin sem Úlfarnir skoruðu. Goncalo Guedes tók forystuna á 26. mínútu eftir að Alisson sendi boltann á hann - auðvelt fyrir Guedes sem lagði boltann í opið markið.
Darwin Nunez jafnaði skömmu fyrir leikhlé eftir frábæra sendingu frá Trent Alexander-Arnold. Svo gerði Mohamed Salah vel að fara inn í sendingu og koma Liverpool yfir í upphafi síðari hálfleiks, staðan orðin 2-1 og útlitið bjart fyrir heimamenn.
Leikurinn var þó áfram opinn og jafn og tókst Hwang Hee-Chan að jafna á 67. mínútu. Skot hans sem virtist mislukkað fór af varnarmanni og lak í gegnum klofið á Alisson sem hefði átt að gera betur.
Liðin héldu áfram að skiptast á að sækja en það voru Úlfarnir sem komu boltanum næst í netið. Brjáluð fagnaðarlæti brutust út þegar Toti setti boltann í netið eftir hornspyrnu og voru leikmenn afar lengi að átta sig á því að flagg aðstoðardómarans var uppi. Rangstaða dæmd.
VAR teymið endurskoðaði atvikið en komst ekki að niðurstöðu vegna vandræða með myndavélarnar á Anfield. Það var engin myndavél með sjónarhorn á meintri rangstöðu og því gátu VAR dómararnir ekki annað gert en leyft upprunalegu ákvörðuninni að standa.
Meira var ekki skorað og lokatölur reyndust 2-2.
