Danski sóknarmaðurinn Thomas Mikkelsen var í stúkunni og sá sitt lið komast yfir snemma leiks. Skot Gísla Eyjólfssonar var varið en Brynjólfur Andersen Willumsson hirti frákastið og skoraði.

HK skoraði úr sínu fyrsta skoti á markið en það var Ásgeir Marteinsson sem skoraði með snyrtilegu skoti frá vítateigsendanum.

Guðjón Pétur Lýðsson fékk tækifæri í byrjunarliði Blika og var nálægt því að endurheimta forystuna fyrir liðið en skallaði í stöng.

Rétt fyrir hálfleik vildu HK-ingar fá rautt á Viktor Karl Einarsson sem braut á Valgeiri Valgeirssyni sem var að sleppa í gegn en gult var niðurstaðan frá Helga Mikael dómara. 1-1 í hálfleik.

Guðjón Pétur kom Breiðabliki í 2-1 í seinni hálfleik en Arnar Freyr Ólafsson var ekki sannfærandi í marki HK. Varamaðurinn Kwame Quee skoraði svo skallamark eftir frábæra fyrirgjöf Guðjóns en þeir tveir eru í harðri baráttu um sæti í liðinu og minntu vel á sig í dag.

Lokatölur: 3-1.

Byrjunarlið Blika: Anton Ari (m); Andri Yeoman, Damir, Elfar, Davíð Ingvars; Oliver, Gaui Lýðs, Gísli Eyjólfs; Viktor Karl, Höskuldur, Brynjólfur.

Byrjunarlið HK: Arnar (m); Birkir Valur, Alexander, Leifur, Hörður; Ásgeir Börkur, Ólafur Örn, Arnþór Atla; Valgeir, Ásgeir Marteins, Bjarni Gunnars.