„Ferðalagið var mjög einfalt, við flugum frá Nürnberg sem er rétt hjá þeim stað þar sem við vorum til Manchester og svo var það rúta á hótelið. Þetta gekk mjög hratt fyrir sig," sagði Glódís Perla Viggósdóttir í viðtali fyrir æfingu kvennalandsliðsins í Crewe á Englandi.
„Við erum nú ekki búnar að sjá mikið, erum bara úti í sveit í einhverri höll og vorum að koma hingað núna í fyrsta skiptið. Þetta æfingasvæði lúkkar bara mjög vel og ég er ánægð með aðstæður."
Opnunarleikurinn EM fór fram í gær þar sem Englendingar, gestgjafarnir, mættu Austurríki fyrir framan um 70 þúsund manns á Old Trafford.
„Það var ógeðslega gaman að sjá það og stórt að sjá að það sé kominn svona mikill áhugi. Þetta er klárlega leikur sem við hefðum viljað spila. Þegar maður var að horfa á dráttinn þá var maður bara að hugsa að þetta var leikurinn. Það voru flott gæði í þessum leik og mér fannst bæði lið vera að spila mjög vel. Þetta var bara frábær byrjun á mótinu."
Viðtalið við Glódísi er talsvert lengra og má sjá það í heild sinni í spilaranum efst í fréttinni. Hér að neðan má sjá kynningarmyndband um hótelið sem kvennalandsliðið dvelur á.
Athugasemdir