Bryndís Arna Níelsdóttir, sóknarmaður Vals.
Bryndís Arna Níelsdóttir, langmarkahæsti leikmaður Bestu deildar kvenna, er ekki í A-landsliðshópnum fyrir komandi leiki gegn Wales og Þýskalandi í Þjóðadeildinni.
Berglind Björg Þorvaldsdóttir er ólétt og það virðast vera vandræði með sóknarmannsstöðuna í landsliðinu, en samt fær Bryndís ekki kallið að þessu sinni. Hún er búin að skora 14 mörk með Val í Bestu deildinni í sumar.
„Bara, mér finnst hún ekki alveg klár í þetta," sagði Þorsteinn um Bryndísi og benti á að hún væri í U23 landsliðinu.
„Ég horfði á hana um daginn með U23 ára landsliðinu á móti Danmörku, það vantaði svolítið upp á hjá henni þar. Maður horfir svolítið í það á alþjóðlegum mælikvarða hvar leikmenn standa. Mér fannst hún ekki klár eins og staðan er í dag. Vonandi sýnir hún bara í komandi leikjum með U23 ára landsliðinu að hún sé klár í A-landsliðið."
Steini sagðist ekki hafa átt neitt samtal við Bryndísi í aðdraganda hópsins.
Athugasemdir
