Vinicius Junior fékk fyrsta tækifæri Real Madrid en skot hans fór framhjá markinu.

Thibaut Courtois var heitur í marki Real Madrid í fyrri hálfleik og sýndi frábær tilþrif undir lok hálfleiksins.

Declan Rice átti fastan skalla sem Courtois varði frábærlega. Gabriel Martinelli fylgdi eftir úr þröngu færi og náði skoti á markið, Courtois var fljótur að átta sig og kom boltanum frá.

Rice var ekki búinn að segja sitt síðasta því hann kom Arsenal yfir eftir tæplega klukkutíma leik þegar hann skoraði með stórkostlegu skoti beint úr aukaspyrnu. Tíu mínútum síðar skoraði hann ekkert síðra mark aftur beint úr aukaspyrnu.

Arsenal menn voru ekki hættir því miðjumaðurinn Mikel Merino, sem hefur verið að spila framherjastöðuna í meiðslakrísu Arsenal, skoraði þriðja mark liðsins með viðstöðulausu skoti eftir sendingu frá Myles Lewis-Skelly.

Eduardo Camavinga kórónaði kvöldið fyrir Real Madrid þegar hann fékk sitt annað gula spjald og þar með rautt í uppbótatíma.

Inter er með yfirhöndina gegn Bayern eftir sigur í Þýskalandi í kvöld.

Lautaro Martinez kom Inter yfir eftir glæsilega sókn en tíu mínútum áður hafði Harry Kane skotið í stöngina úr góðu færi.

Thomas Muller, sem mun yfirgefa Bayern eftir tímabilið, kom inn á sem varamaður þegar stundafjórðungur var til loka venjulegs leiktíma. Tíu mínútum síðar jafnaði hann metin þegar hann skoraði af stuttu færi eftir fyrirgjöf frá Konrad Laimer.

Davide Frattesi tryggði Inter sigurinn með marki eftir hraða sókn.

Arsenal 3 - 0 Real Madrid
1-0 Declan Rice ('58 )
2-0 Declan Rice ('70 )
3-0 Mikel Merino ('75 )
Rautt spjald: Eduardo Camavinga, Real Madrid ('90)

Bayern 1 - 2 Inter
0-1 Lautaro Martinez ('38 )
1-1 Thomas Muller ('85 )
1-2 Davide Frattesi ('88 )