„Mér fannst þetta hörkuleikur og Víkingarnir eru með hörkulið. Það var svakalega svekkjandi að fá á sig mark svona snemma leiks. Við létum það ekki slá okkur út af laginu og sköpuðum okkur nóg af færum til að gera meira en eitt eða tvö mörk," sagði Jóhannes Karl Guðjónsson, þjálfari ÍA, í viðtali við Hafliða Breiðfjörð eftir jafntefli gegn Víkingi í kvöld.
Lestu um leikinn: ÍA 1 - 1 Víkingur R.
„Mér fannst þetta vera klár rangstaða en ég hef ekki alltaf rétt fyrir mér. Ég er ekki búinn að sjá þetta aftur en mér fannst þetta alltaf trufla markmanninn," sagði Jói Kalli sem var ósáttur með markið sem Víkingur skoraði á upphafsmínútu leiksins. Boltinn hrökk af Árna Snæ, markverði ÍA, í Helga Guðjónsson í netið.
„Við komumst í betri stöður, hærra á vellinum í seinni hálfleik og Þórður ver í þrígang alveg frábærlega og heldur Víkingum í forystunni þangað til við fáum vítið. Það er mín skoðun að við vorum betri í leiknum. Ég man ekki eftir neinu einasta færi sem Víkingarnir fengu."
Brynjar Snær Pálsson þótti eiga góðan dag á miðjunni hjá Skagamönnum.
„Brynjar er hörku leikmaður og á bara eftir að verða betri. Hann á eftir að fá meiri reynslu, hann er góður í fótbolta og með góðar spyrnur," sagði Jói Kalli að lokum.
Viðtalið í heild má sjá í spilaranum hér að ofan.
