Spánn: Atlético hafði betur gegn nýkrýndum meisturum Real Madrid

Carlo Ancelotti gerði töluverðar breytingar á liði sínu frá sigrinum á Manchester City í Meistaradeildinni í vikunni en Karim Benzema, Vinicius Junior, Thibaut Courtois, Dani Carvajal og Luka Modric voru meðal annars allir á bekknum.

Eina mark leiksins gerði Yannick Carrasco úr vítaspyrnu er Jesus Vallejo braut á Matheus Cunha innan teigs. Carrasco átti þá skot í stöng í síðari hálfleiknum og þá klúðraði Antoine Griezmann nokkrum góðum færum.

Nýkrýndir Spánarmeistarar Real Madrid fengu líka sín tækifæri en Jan Oblak varði tvisvar frá Federico Valverde og svo aukaspyrnu frá Marco Asensio undir lokin.

Atlético er í 4. sæti með 64 stig, sex stigum á undan Real Betis þegar þrír leikir eru eftir og liðið því í góðri stöðu um að komast í Meistaradeildina á næstu leiktíð.

Villarreal, sem komst í undanúrslit Meistaradeildarinnar, gerði 1-1 jafntefli við Sevilla. Giovani Lo Celso kom Villarreal yfir á 86. mínútu en franski varnarmaðurinn Jules Kounde jafnaði undir lok leiksins.

Villarreal er í 7. sæti og harðri baráttu um Evrópusæti en liðið situr nú þremur stigum á eftir Real Sociedad.

Úrslit og markaskorarar:

Atletico Madrid 1 - 0 Real Madrid
1-0 Yannick Carrasco ('40 , víti)

Getafe 0 - 0 Rayo Vallecano

Espanyol 1 - 1 Osasuna
0-1 Enrique Barja ('42 )
1-1 Nicolas Melamed Ribaudo ('67 )

Villarreal 1 - 1 Sevilla
1-0 Giovani Lo Celso ('86 )
1-1 Jules Kounde ('90 )