Hvað byrja margir úr gamla bandinu í kvöld?

Þegar Ísland fór í 8-liða úrslit á EM í Frakklandi var sama byrjunarliðið í öllum fimm leikjum liðsins. Allir leikmennirnir úr því byrjunarliði eru í íslenska landsliðshópnum sem mætir Rúmenum í umspili um sæti á EM í kvöld.

Ljóst er að byrjunarliðið í kvöld verður svipað og á EM 2016. Alfreð Finnbogason mun líklega koma inn í fremstu víglínu. Líklegt er að Alfreð byrji einn frammi í kvöld en á EM voru Kolbeinn Sigþórsson og Jón Daði Böðvarsson frammi.

Guðlaugur Victor Pálsson er líklegur til að byrja á miðjunni eða í hægri bakverði. Birkir Már Sævarsson er kominn aftur í hópinn en hann gæti byrjað á bekknum. Birkir var hægri bakvörður á EM 2016 og HM 2018 en hann hefur ekki verið í hópnum að undanförnu og Hjörtur Hermannsson gæti byrjað í bakverðinum líkt og gegn Englandi í síðasta mánuði.

Þá er mögulegt að Hörður Björgvin Magnússon verði tekinn fram yfir Ara Frey Skúlason í vinstri bakverðinum líkt og á HM 2018.