| mán 09. september 2019 13:41 |
|
Jón Daði: Ræðst örugglega á einhverjum smáatriðum
Jón Daði var á skotskónum gegn Moldóvu.
Ísland fagnar marki.
Jón Daði skoraði sitt þriðja landsliðsmark gegn Moldóvu, hans fyrsta landsliðsmark síðan á Evrópumótinu fyrir þremur árum.
„Það er fínt að ná þessu marki eftir langa bið, fínt upp á sjálfstraustið að gera. Það er hlutverk mitt í þessari stöðu sem ég er í, að skora mörk. Ef ég geri það ekki, þá verð ég alla vega að gera allt hitt rétt líka, allar hinar hliðarnar sem fylgja þessu. Þetta er frábært lið að vera í. Ég reyni alltaf að skila mínu eins vel og ég get."
Kolbeinn Sigþórsson byrjaði frammi með Jóni Daða gegn Moldóvu og voru þeir báðir á skotskónum. Hvort er það betra að vera einn frammi eða með einhvern með sér?
„Það er misjafnt. Það fer mikið eftir þeim leikjum sem við erum að spila og hvernig liðum við erum að spila á móti. Mér líður vel í þessu leikkerfi eins og hverju öðru."
„Það var líka gott að spila með Kolla aftur. Það minnti mann á gamla tíma, góða tíma."
Verður virkilega erfiður leikur
„Þetta er ágætt," segir Jón um að vera kominn til Albaníu. „Það er stutt á milli leikja. Við erum komnir á þetta hótel og það er hvíld, næring og allur pakkinn til að ná orkunni til baka því þetta verður virkilega erfiður leikur á morgun."
Jón segist vera klár í slaginn fyrir leikinn gegn Albaníu, en búast má við miklum baráttuleik.
„Þeir eru sterkir á heimavelli og þeir nokkuð öflugir á móti okkur á Laugardalsvelli. Þetta verður öðruvísi leikur en gegn Moldóvu og ræðst örugglega á einhverjum smáatriðum. Við gerum okkar besta til að það verði okkur í vil."
Það er mikilvægt að taka stigin þrjú upp. Með sigri skiljum við Albaníu eftir og búum til þriggja hesta kapphlaup með Tyrklandi og Frakklandi um efstu tvo sætin í riðlinum.
„Algjörlega. Hvert einasta stig í þessum riðli er svakalega mikilvægt. Þau verða svakalega öflug stigin þrjú ef við náum sigri á morgun," sagði Jón Daði að lokum.
Athugasemdir
Nýjustu fréttirnar
11:00
23:35
