Fimmta umferðin í La Liga verður leikin um helgina en á laugardag leikur Barcelona gegn Cadiz sem er stigalaust á botni deildarinnar. Það hefur allt gengið á afturfótunum hjá Cadiz, sem afrekaði það reyndar á síðasta tímabili að vinna Barcelona 1-0.

Líklegt er að Xavi, þjálfari Börsunga, verði með annað augað á Meistaradeildarleiknum gegn Bayern München í næstu viku og það gæti verið freistandi að hvíla pólska markahrókinn Robert Lewandowski sem skoraði þrennu gegn Viktoria Plzen í vikunni.

Hector Bellerín og Marcos Alonso gætu verið með um helgina en þeir komu til Börsunga fyrir gluggalokin í síðustu viku.