Carsley var mjög ánægður eftir sigurinn sem hann segir hafa aukið sjálfstraustið sitt til muna.

Carsley er aðeins bráðabirgðaþjálfari landsliðsins í dag en vonast til að fá langtímasamning ef vel gengur í næstu leikjum.

„Ég á í mjög góðu sambandi við stjórn enska fótboltasambandsins og er verulega þakklátur fyrir þetta tækifæri til að stýra enska landsliðinu," sagði Carsley.

„Það hafa verið tímar þar sem ég efaðist um að vera tilbúinn fyrir þetta starf. Það er auðvelt að sitja heima í sófanum og þjálfa enska landsliðið þaðan, það er allt annað að vera kominn í starfið.

„Þessi sigur í Dublin jók sjálfstraustið hjá mér og öllu starfsteyminu mínu til muna. Við sjáum það að við munum spjara okkur.

„Mér líður eins og andrúmsloftið hjá okkur sé frábært og við eigum í mjög góðum samskiptum við leikmennina."

Carsley stýrði U21 landsliði Englands við afar góðan orðstír í þrjú ár áður en hann fékk bráðabirgðastarfið hjá A-landsliðinu. Carsley var við stjórn þegar U21 landsliðið vann Evrópumótið í fyrra.