Cambiaso er kominn með tvö mörk og tvær stoðsendingar í 28 leikjum á tímabilinu.
Cristiano Giuntoli, yfirmaður fótboltamála hjá Juventus, viðurkenndi í viðtali að Manchester City hafi reynt að kaupa Andrea Cambiaso í janúar.
Cambiaso er fjölhæfur bakvörður sem getur bæði leikið vinstra megin og hægra megin í varnarlínunni þar sem hann er jafnfættur.
Hann er 24 ára gamall og sinnir mikilvægu hlutverki í sterku liði Juventus, auk þess að eiga 13 landsleiki að baki fyrir Ítalíu.
„Já, það er rétt. Stórt félag frá Englandi hafði áhuga en það varð ekkert úr því. Við erum ánægðir með að halda Andrea hjá okkur, við erum vanir því að stór félög sýni áhuga á ungu leikmönnunum okkar," svaraði Giuntoli þegar hann var spurður út í tilboð frá Man City.
Cambiaso á fjögur og hálft ár eftir af samningi við Juventus og segja ítalskir fjölmiðlar að Man City hafi verið reiðubúið til að borga um 50 milljónir evra til að kaupa bakvörðinn. Juventus vildi fá 75 milljónir og því varð ekkert úr skiptunum.
Athugasemdir
